Fréttir og pistlar

31 mars 2016

Viðurkenning Öldrunarráðs Íslands til fyrirmyndar fyrirtækis varðandi vinnutilhögun og starfslok eldri starfsmanna er háð neðangreindum skilyrðum:

Fyrirtækið hafi starfsmannastefnu um neðangreind atriði varðandi sveigjanleg starfslok og vinnutilhögun á síðustu árum fyrir starfslok. 

1. Tímanlega fyrir starfslok séu kannaðar óskir starfsmanns um aðlögun að starfslokum og honum/henni gefinn kostur á að fara í hlutastarf eða ábyrgðarminna starf.
2. Við starfslok eigi starfsmaður kost á lausráðningu gegn greiðslu tímakaups fyrir unninn tíma í 6 – 12 mánuði í senn hafi hann áhuga á því. 
3. Til aðlögunar að breyttum aðstæðum við starfslok bjóði fyrirtækið starfsmönnum á námskeið, þar sem veitt er fræðsla um fjárhagslegar breytingar frá því að vera vinnandi maður yfir í að vera eftirlaunaþegi. 

Farið er yfir það sem tekur við, svo sem greiðslur almannatrygginga, lífeyrissjóða og annars sem skiptir máli.

Æskileg viðbót við framangreint gæti til dæmis verið:

• Að fyrrverandi starfsmönnum sé gefinn kostur á að taka áfram þátt í árshátíðum innan fyrirtækisins og öðrum viðburðum.
• Að fyrrverandi starfsmönnum sé boðið reglulega í heimsókn til að hitta fyrrverandi samstarfsmenn.
• Að fyrrverandi starfsmenn fái áfram fréttabréf fyrirtækisins ef þeir óska þess.

23 mars 2016

Þann 12. apríl nk. kl. 12:30 – 16:00 mun Öldrunarráð Íslands og Öldrunarfræðafélagið halda námsstefnu á Grand Hótel um viðbrögð við ofbeldi gagnvart öldruðu fólki.
 
Námsstefnan er sérstaklega ætluð starfsfólki hjúkrunarheimila, heimaþjónustu og heimahjúkrunar, þjónustuíbúða, heilsugæslu, Landspítala og dagvistana fyrir aldrað fólk.
 
Nánari upplýsingar ásamt dagskrá verða send út síðar.
 
Undirbúningsnefnd

30 nóvember 2015

Hér má nálgast þau erindi sem flutt voru á ráðstefnunni.

•  Skilgreiningar á ofbeldi gagnvart öldruðum og birtingamyndir á Íslandi
• Ofbeldi gagnvart öldruðum – sjónarhorn lögreglu
• Hversu alvarlegt er ofbeldi gagnvart öldruðum? – Út frá sjónarhorni fjármála
• Hlutverk réttindagæslumanna fatlaðra – er þörf fyrir slíkt meðal aldraðra?

18 maí 2015

Framtíðarþing um farsæla öldrun var haldið í sal Háskólans á Akureyri í gær, mánudag. Rúmlega 60 manns á öllum aldri sátu þingið og kom meðal annars fram í máli fundarmanna að það þyrfti síður en svo að kvíða hækkandi aldri. Einnig að mikilvægt sé fyrir starfsfólk í velferðarþjónustu að þekkja til hlítar þarfir og óskir aldraðra til að geta veitt sem besta þjónustu. Þá kom einnig fram að halda þurfi áfram að þróa þjónustuna við aldraða, t.d. félagsstarf og annað sem þessum hópi standi til boða.

Framundan er úrvinnsla gagna af þinginu og skýrslugerð með niðurstöðunum, en segja má að eitt af markmiðum þingsins sé að niðurstöðurnar verði leiðbeinandi fyrir stjórnvöld um það hvernig aldraðir vilja sjá sín mál þróast til framtíðar.

Framtíðarþingið á Akureyri var samstarfsverkefni Öldrunarráð Íslands, Akureyrarbæjar, Félags eldri borgara á Akureyri, Háskólans á Akureyri, Landsambands eldri borgara og Velferðarráðuneytisins. Stutt ávarp í upphafi þings fluttu Eiríkur Björn Björnsson, bæjarstjóri Akureyrar og Eyjólfur Guðmundsson, rektor HA.

Frekari upplýsingar veita Pétur Magnússon, formaður Öldrunarráð Íslands, í síma 841 1600, netfang This email address is being protected from spambots. You need JavaScript enabled to view it., og Ingrid Kuhlman þingstjóri í síma 892 2987, netfang This email address is being protected from spambots. You need JavaScript enabled to view it..

Skýring við hópmynd, frá vinstri:

Pétur, formaður Öldrunarráðs, Ingrid Kuhlman, þingstjóri, Eiríkur Björn Björgvinsson, bæjarstjóri á Akureyri, Jóna Valgerður Kristjánsdóttir, fráfarandi formaður Landssambands eldri borgara, Sigurður Hermannsson, formaður Félags eldri borgara á Akureyri, og Eyjólfur Guðmundsson, rektor Háskólans á Akureyri.