Viðurkenning Öldrunarráðs Íslands 2024
Árlega veitir Öldrunarráð Íslands sérstaka viðurkenningu sem kallast Fjöreggið til einstaklings,stofnunar eða félagasamtaka sem hafa unnið einstakt starf tengt málefnum eldra fólks.
Stjórn Öldrunarráðs ákvað að veita Rannveigu Guðnadóttur viðurkenninguna og Fjöreggið fyrir árið 2024. Rannveig er stofnandi og verkefnastjóri Eden Alternative á Íslandi. Rannveig er hjúkrunarfræðingur með Diplóma í Stjórnun, MSc í kennslu og öldrunarfræði. Hugsjón Rannveigar er að vellíðan sé sett í fyrsta sæti þeirra einstaklinga sem þurfa þjónustu og stuðning sem og þeirra sem þjónusta og styðja aðra.
Úthlutun styrks Rannsóknarsjóðs Öldrunarráðs Íslands2024
María Finster Úlfarsson doktorsnemi í hjúkrunarfræði við Háskólann á Akureyri hlaut styrk Rannsóknarsjóðs Öldrunarráðs Íslands í ár. Hún er að vinna að rannsókn á reynslu sona af tengslum við aldraðar mæður sínar á hjúkrunarheimili og stuðningi sem þeir fá frá heilbrigðisstarfsfólki.
Rannsóknin er fyrsti hluti doktorsrannsóknar Maríu en heildarmarkmið rannsóknarinnar er að kanna kynjamun á samskiptum fullorðinna barna og mæðra þeirra, sem búa á hjúkrunarheimilum og greina þarfir barnanna fyrir fræðslu og stuðning frá heilbrigðisstarfsfólki. Leiðbeinandi Maríu er Dr. Kristín Þórarinsdóttir, dósent.
Stjórn öldrunarráðs bárust nokkrar góðar umsóknir og því var úr vöndu að ráða. Rannsóknin þótti metnaðarfull og eins þótti stjórn áhugavert að beina sjónum sínum að reynslu sona og þeirra þarfa þar sem mun oftar hefur verið litið til reynslu dætra.
Á meðfylgjandi mynd má sjá hluta stjórnar Öldrunarráðs Íslands með Maríu styrkþega í miðið. Styrkurinn var veittur að venju á afmælisdegi Gísla Sigurbjörnssonar upphafsmanns sjóðsins í glænýju kaffihúsi hjúkrunarheimilisins Grundar sem var vígt við sama tilefni.
Bls 1 af 2