Samstarfsnefnd um málefni aldraðra hefur skilað félags- og húsnæðismálaráðherra tillögum sínum um þau atriði sem nefndin telur að ráðherra skuli setja í forgang við mótun og framkvæmd stefnu í málefnum aldraðra á næstu árum.
Samstarfsnefnd um málefni aldraðra er fimm manna lögbundin nefnd, skipuð af félags- og húsnæðismálaráðherra. Hlutverk nefndarinnar er að vera ráðherra og ríkisstjórn til ráðuneytis um málefni aldraðra og vera tengiliður milli ráðuneyta, stofnana og samtaka sem starfa að málefnum aldraðra.
Samstarfsnefndin hefur unnið að mótun meðfylgjandi tillagna í rúmt ár og eru þær kærkominn leiðarvísir um mikilvæg verkefni, áherslur og úrbætur í málefnum aldraðra til næstu ára, sagði Eygló Harðardóttir, félags- og húsnæðismálaráðherra, þegar hún tók við stefnuskjalinu úr hendi Elínar Jóhannsdóttur, formanni nefndarinnar, í dag.
Í tillögum samstarfsnefndarinnar er áhersla lögð á einföldun almannatryggingakerfisins þar sem réttindi aldraðra verði betur skilgreind. Einnig er fjallað um rétt aldraðra til sjálfstæðrar búsetu og sjálfræðis, hvort sem um er að ræða búsetu á eigin heimili eða á öldrunarheimili. Þá skuli öldruðum gert kleift að aðlaga sig breyttum aðstæðum og nýta sér úrræði/lausnir sem auka sjálfsbjargarmöguleika þeirra. Jafnframt telur nefndin mikilvægt að sett verði gæðaviðmið á öllum sviðum þjónustu við aldraða, ásamt því að auka upplýsingagjöf og eftirlit með gæðum þjónustunnar.
Tillögur samstarfsnefndarinnar eru settar fram í ellefu liðum og snúa að;
-
einföldun almannatryggingakerfisins,
-
heilsueflingu og aukinni virkni aldraðra,
-
rétti aldraðra til sjálfstæðrar búsetu og sjálfræðis,
-
mikilvægi nýsköpunar og tækni í þjónustu við aldraða,
-
setningu gæðaviðmiða fyrir þjónustu við aldraða,
-
eftirliti með gæðum þjónustu við aldraða,
-
stöðugleika og aukinni hæfni starfsfólks í öldrunarþjónustu,
-
stefnu og úrbótum í málefnum aldraðra með heilabilun,
-
stofnun upplýsingavefs um öldrun og aldraða,
-
réttindagæslu aldraðra,
-
umfjöllun um óljós ábyrgðarsvið þjónustuaðila, „grá svæði“ í þjónustu við aldraða og áherslu á notendasamráð.
Myndatexti: Á meðfylgjandi mynd eru, auk Eyglóar Harðardóttur, félags- og húsnæðismálaráðherra, Elín Jóhannsdóttir, formaður samstarfsnefndarinnar, og nefndarmennirnir Guðmundur Einarsson, Haukur Ingibergsson og Anna Birna Jensdóttir, ásamt Klöru Baldursdóttur Briem og Guðrúnu Björk Reykdal, sérfræðingum í velferðarráðuneytinu, sem starfað hafa með nefndinni.
